Didulang sadulang lai
Pandulang ameh di Bangko
Diulang sa ulang lai
Panjalang nan tingga cako
Sebelok kito tak ka rimbo
Lai ko sanak bapadi ladang
Sabelok kito tak basuo
Lai ko sanak bahati sonang sajo
Di ujung kaba nan dahulu
Kan tanam kambeh jo pario
Batobek bataman-taman
Longkok babatiang jo bajawi
Mamutieh jawi di tongah padang
Maitam kabau di tongah sawah.
Basalisieh urang di ateh
Dek sairieng balain jalan
Mailak urang kaduo dari ranah Minang.
Manariak diri bahaso kini
Pak Hatta jadi rakyat biaso
Rajo sipatokah dapek angin
Bapisah awak jo urang Batawi
Tabik sifat perwira Muhamad Husin
Tagak bandera PRRl
Dituruikan dek Simbolon
Cakak basosoh sasamo awak
Intai maintain sasamo kito.
Nan ketek indak nyo tingga
Sato jadi tantara pelajar
Di SMP baru sakolahnyo
Tentara DBI namonyo
Pihak didiri urang Betawi
Tantara pusaik dibori namo
OPR organisasi rakyat di nagori
Induak-induak nyo bao soto
Gerwani nyo bori namo
Diasuah bahaluan kida.
Baitu OPR tabao lendong
Dek ketek baru ka godang
Dek binguang baru ka codiek
Raso inyo nan punyo dunie
Kito raso manompang
Tinggi inyo nak maimpok
Godang inyo nak malendo
Lah bak labu di bonam
Tambah di bonamkan makin manjadi
Nan bedo kok ado kasumek
Jaleh awak ka ilang malam
Kabau ilang sikua sikua
Jawi raik tangah malam
Dek nagori sodang angek
Ontah kamano ka mangadu.
Dek mandeh lai nan marusuah
Lah lotieh badan bausaho
Tabuang tanago salamo ko
Padi manguniang tangah sawah
Jaguang maupieh dalam porak
Tapi indak dapek diambiek
Dek porang sadieng basosoh
Di rumah lai babuek tinggi
Tampek bamain samo ketek
Babuek lubang di bawah kandang
Kok nyampang porang basosoh
Indak dapek poi *ijok
Tapaso manyuruak dalam lubang
Bakapuru anak baranak.
Nan bedo ado nan lopeh angin
Angin baputa dalam lubang
Baunnyo lamo mangko hilang
Samo dinikmatin sajo basamo
Dek Tantra Lua mangkin tasosak
Ndak mungkin kampuang diunyi
Tapaso *ijok masuak rimbo.
Di siko samakin bedo
Namonyo awak manyuruak.
Tantu cahayo indak ado
Kok lai balampu togok kamano ka diboli.
Tapaso babuek minyak karambie
Basumbu jo kapuak kasua
Balotakan dalam buluah godang
Nak jan tampak dek tantara pusaik
Kok nyampang aman saketek
Batuai juo padi di sawah
Sato diangkuk ka tompek ijok.
Nyampang lai ado karambie
Babuek jo lado jintan
Kok lai ado nan masak
Lah daulu urang maabiek
Nan bedo bona garam kok abih
Suliknyo mintak ampun
Ado sabingkah batuka jo saikua jawi
Baitu nasib ditanggungkan.
Di siko kalam dihontikan
Nanti dek sabelok lai.
( Mak Pado )
Catatan. *Ijok = Evakuasi ke dalam Lubang
Facebook Comments