Beranda Garitie Rang khasok khociek: Jonji Politik Namonyo

Rang khasok khociek: Jonji Politik Namonyo

Rang khasok khociek
“Ba a dek sampai dicarinyo Rang khasok khociek dek pak DPR tu cako nakan..?” Tanyo Mak Kimin ka si Rumbai. “Apak tu mambaok inyo ba karojo Mak, tapi inyo ndak tibo tibo do..” nyo si Rumbai manjawab. Ba a pulo caritonyo tu..?” tanyo Mak Kimin penasaran.    “Kobanyo cando iko kejadiannyo mah Mak…Pagi tu…” kato Si Rumbai mulai carito.

“Rang Kasok Khociek lai nomuah bakarojo jo Apak? ” jonyo pak De tu.                           “Lai nyo Pak, bapo dek ka indak pulo yo. Tapi agih Dent libur?”kecek Rang khasok khociek.

“Jadih.. Diagih Rang Khasok Khociek libur sokali sominggu”jawab pak De tu.

“Kalau sakali saminggu yo indak do, kecek Rang khasok khociek, tapi kalau lai tiok pokan Dent diagiah libur indak bapo do, kan lai bisa pulo Dent berakhir pekan, cando Apak”.

“Kalau baitu kondak Rang khasok khociek, jadih.. ikoo panjar gaji Rank khasok kho ciek daw ha.. “kecek pak De tu sambia ma agiah pitih ka liau untuak gaji sabulan.

“Isuik sajolah Pak.. “jawab Rang khasok khociek.

“Trimo sajolah daw.. ” kecek pak De mamaso.

“Jan leh pak.. Dent ndak buliah bo utang dek mendiang abah Dent do, walaupun utang jonji”kecek Rang khasok khociek.

“Indak bapo do, kok mungkie jonji? Apak lah ikhlas”kecek pak De.

Tantu iyo ditarimonyo dek Rang khasok khociek. Dan pitih tu lah kami balanjoan.

Lah sampai sopokan, dituruknyo Rang khasok khociek dek Apak itu.

“Apo dek ndak tibo tibo Rank Khasok? “nyo inyo.

“Oih ntaaaang… Dent kan libur Pak? Jawab Rang khasok.

“Libur bapo pulo? Lun jadi bakojo leh tu lah libur sekali?”nyo inyo.

“Dent Apak agiah pitih sonjo Jumat, kan iyo?”kecek Rang khasok manjolehan duduak pakaronyo.

“Iyo.. “kecek pak De. “Hari sabtu, pokan sotu di Sarilomak, Dent libur, kan baitu jonji kito? “kecek Rang kasok.. “Iyo.. Tapi… Hari Akad bapo dek… “jawab pak De.

“Donga dek Apak dolu…” kecek Rang khasok mamotong kecek pak De tu.

“Hari akad, kan pokan pulo di Ibuah Payokumbuah ndak? Tontu Dent libur pulo baliak”jonyo Rang khasok.

“Hari Sanoyan, lah pokan pulo di Taram. Tontu lah ka kiun pulo Dent..” kecek Rang kasok manjolehan. Salasa, roba’a sampai sanoyan urang pokan juo, tontu Dent libur juo baru.. Sadangkan jonji kito “tiok pokan” Dent libur, kan baituu? kecek Rang khasok manjolehan ka pak De.

“itu Jonji Politi namonyo tu.!  Jonji duto tu mah? “jonyo pak De agak tarangah.

“Apak kan cando itu pulo bojonji? Kotu Kompaye Apak kecekkan ka kami nan kenek kenek nyak, maso Kopalo bonda ka apak pelok-an abih bulan. Lobuah nan rusak, ka dibaikan abih taun, kan iyo? Qiamat hari, baru bulan di ateh langik tu abih mah. Tahun, bilo ka barakhirnyo? Ha, tu bilo kopalo bonda kami nyak ka elok?” kecek Rang khasok lah agak emosi pulo..

Mandonga itu, Apak tuu, manyingoeh sajo leh. Malunyo mungkin, karono urang rami di situ.

“Ndak baitu do Rang khasok, minum kopi lah awak dulu ka kodai ten ha…” kecek pak De ma ajak inyo.

“Ndeh.. Jan leh Pak, Kambiang Dent ten baranak pulo ha…” kecek Rang khasok mailak.

“Tu kami lah poi ka iko…sobab janji pak De tu lah dituntuknyo dek urang rami tu..” kecek si Rumbai manutuk carito.

Penulis:Mulyadi

Facebook Comments

Artikulli paraprakBunda PAUD Kota Padang: Tumbuhkan Minat Baca Anak Sejak  Dini
Artikulli tjetërPSP Padang Siap Berlaga di Liga 3 Indonesia